Боз үй — жөн гана турак жай эмес, ал ааламдын модели, ата-бабаларыбыздын табият менен айкалышкан терең философиясынын чагылышы. Деңиз деңгээлинен үч миң метрден ашык бийиктикте жайгашкан Соң-Көлдө боз үйдө түнөө — ар бир саякатчынын жашоосундагы эң таасирдүү учурлардын бири.
Түндүктөн ачылган чексиз асман
Боз үйдүн борбордук бөлүгү болгон түндүк күн менен түндүн алмашуусун гана эмес, жашоонун уландысын билдирет. Түнкүсүн от өчүп, төшөктө жатканыңызда, түндүктөн миллиондогон жылдыздар көрүнөт. Тоонун салкын шамалы кийиздин жытын аралап, ичкериге киргенде, адам өзүн ааламдын бир бөлүгү катары сезет.
«Боз үйдө бурч жок — ал жерде бардык адамдар тең укуктуу жана бир бүтүндүктүн кучагында.»
Кымыз жана меймандостук
Жайлоодогу күн эрте таңдан башталат. Бээлер саалып, сабада кымыз бышылат. Кыргыздын меймандостук салты боюнча келген конок эч качан даам ооз тийбей кетпейт. Ысык нан, жаңы каймак жана салкын кымыз денеге күч-кубат, жанга тынчтык тартуулайт.